【操盤手札記】中美貿易談判輸唔起(割柑人) – 香港蘋果日報

中國上月出入口數據遠衰過預期,反映喺中美貿易戰下,外貿內需同時急跌,經濟放緩風險急升。地球另一邊,美國亦唔掂,美銀、摩通、高盛嘅市場指標,分別預示未來一年經濟衰退機會高達64%、50%、50%。月底嘅中美貿易談判,雙方都輸唔起!

相關新聞:【Can Bank】揸住長和要再守一會(散子)

中美經濟不濟,港股隨即碌低,周一收跌1.4%,報26298。陰陽燭呈現大陰燭,跟上周四、五嘅陽燭同吊頸形態組成黃昏之星,短線或會向下回補26000水平嘅上升裂口,只要守穩上升裂口,有望整固再上。欲知後市如何,且看美股業績、英國脫歐,以及貿談消息。

講到貿談,上周喺北京舉行嘅中美副部級貿談就冇料到。不過,值得注意嘅係,喺中美貿談之時,美國貿易代表萊特希澤亦喺華盛頓同歐盟、日本舉行貿談,就修補世貿(WTO)中「非市場導向政策」,包括工業補貼、強制技術轉移等,達成共識。橫睇掂睇,擺明針對中國!

相關新聞:【何車500】謝清海億四酬金料削7成(何車)

副總理劉鶴將於月底訪美進行新一輪中美貿談,傾過偈、摸過底,估計點都有個貿易協議框架出嚟。不過,就算有料到,中國未來幾個月嘅出口仍會低迷,中央需要加碼扶持經濟。事實上,中央繼降準後,已點名扶持多項產業,包括汽車、家電、風電、光伏發電等。

中央加速放水,亦對內房有利。花旗、大摩、中信里昂預計,內房今年將會跑贏大市,後者更指2019年係2015年翻版,部分城市已見政策鬆綁,喺內房貢獻GDP達15%下,料有更多鬆綁措施。麥格理亦認為政策風險比舊年低;瑞銀就話下行周期比過往健康。

內房股中,大摩、中信里昂、瑞銀嘅買入名單都見旭輝(884),前者更列為首選之一。該股剛公布舊年銷情,銷售額為1,520億元(人民幣,下同),按年增長46%;以上半年銷售額660億元計,即下半年銷售額達860元。該股現價市盈率4.7倍,股息率7.4厘,可以諗諗。

investMANFor People of Style & Substance掌握理財智慧 感受生活品味

http://facebook.com/investMAN.hk